September 2018

രാമപുരം സഹകരണ ബാങ്ക് ജനാധിപത്യ മുന്നണി തൂത്ത് വാരി.


പാലാ: രാമപുരം: പാലായുടെ രാഷ്ടീയ ചൂണ്ടുപലകയായ രാമപുരം പഞ്ചായത്തിലെ  രാമപുരം സഹകരണ ബാങ്ക് തെരെഞ്ഞെടുപ്പിൽ കേരളാ കോൺഗ്രസ് (എം) നേതാവും ബാങ്ക് പ്രസിഡന്റുമായിരുന്ന വി.എ ജോസ് ഉഴുന്നാലിലും, മഹിളാ കോൺഗ്രസ് ജില്ലാ വൈസ് പ്രസിഡന്റായ  മോളിപീറ്റർ നേതൃത്വം നൽകുന്ന ജനാധിപത്യ മുന്നണി വിജയിച്ചു.

കേരളാ കോൺഗ്രസ് (എം) ലെ അഭിപ്രായ വ്യത്യാസം കൊണ്ട് ശ്രദ്ധേയമായിരുന്നു ഈ ബാങ്ക് തെരഞ്ഞെടുപ്പ്..നിലവിൽ ബാങ്ക് പ്രസിഡണ്ടായിരുന്ന വി.എ ജോസ് ഉഴുന്നാലിൽ (ഏപ്പച്ചൻ)കോൺഗ്രസിനെ സഖ്യകക്ഷിയാക്കി ജനാധിപത്യ മുന്നണി എന്ന പേരിൽ മത്സരിച്ചപ്പോൾ, ബാങ്ക് വൈസ് പ്രസിഡന്റും, കേരളാ കോൺഗ്രസ് (എം) രാമപുരം മണ്ഡലം പ്രസിഡൻറുമായ ബൈജു ജോൺ പുതിയിടത്ത് ചാലിയുടെയും, സി.പി.എം ലോക്കൽ സെക്രട്ടറി ജി.എം ജാന്റിഷിന്റെയും നേതൃത്വത്തിൽ സഹകരണ മുന്നണി എന്ന പേരിലാണ് മത്സരിച്ചത്.

പൊതു തെരെഞ്ഞെടുപ്പിന്റെ വാശിയിൽ നടന്ന ബാങ്ക് തെരെഞ്ഞെടുപ്പിന്റെ കൺവൻഷനിൽ തന്നെ വൻ ജനസാന്നിദ്ധ്യം ശ്രദ്ധേയമായിരുന്നു. ജനാധിപത്യ മുന്നണിയുടെ കൺവൻഷൻ ഡി.സി.സി വൈസ് പ്രസിഡന്റ് ബിജു പുന്നത്താനം ഉദ്ഘാടനം ചെയ്തപ്പോൾ സഹകരണ മുന്നണിയുടെ കൺവൻഷൻ കേരളാ കോൺഗ്രസ് (എം) നിയോജക മണ്ഡലം പ്രസി.ഡന്റ് ഫിലിപ്പ് കുഴി കുളമാണ് ഉദ്ഘാടനം ചെയ്തത്.

തെരെഞ്ഞെടുപ്പിലെ സംഘർഷ സാധ്യത  കണക്കിലെടുത്ത്   പോലീസ് വൻ സുരക്ഷാ സന്നാഹം ഒരുക്കിയിരുന്നു.പാലാ ഡി.വൈ.എസ് പി ഷാജിമോന്റെ നേതൃത്വത്തിൽ 200 ഓളം പോലീസാണ് അണിനിരന്നത്.

രാവിലെ 9 മുതൽ  വൈകിട്ട് 4 വരെയാണ് വോട്ടെടുപ്പ് നടന്നത്. വോട്ടെടുപ്പ് കഴിഞ്ഞ് ഒരു മണിക്കുറിനുള്ളിൽ  വോട്ടെണ്ണൽ ആരംഭിച്ചു .ആകെയുള്ള 13 ഭരണ സമിതി അംഗങ്ങളിൽ 12 അംഗങ്ങളെ വിജയിപ്പിച്ച് ജനാധിപത്യ മുന്നണി തൂത്തുവാരിയുള്ള വിജയമാണ് നേടിയത്.

സഹകരണ മുന്നണിയിൽ നിന്ന് വിജയിച്ചത് പഞ്ചായത്ത് പ്രസിഡന്റ് കൂടിയായ ബൈജു ജോൺ പുതിയിടത്ത് ചാലിയാണ്. സഹകരണ മുന്നണിയിൽ മത്സരിച്ച എല്ലാ ഇടത് സ്ഥാനാർത്ഥികളും പരാജയപ്പെട്ടു.

 ജനാധിപത്യ മുന്നണിയെ നയിച്ച വി എ ജോസ് ഉഴുന്നാലിക്കും.,മോളി പീറ്റർക്കും മികച്ച ഭൂരിപക്ഷം ലഭിച്ചിട്ടുണ്ട്.. വി എ ജോസ് ഉഴുന്നാലി 3423 വോട്ട് നേടി.മോളി പീറ്റർ 3903വോട്ട് നേടി.സി.ടി രാജൻ 3148വോട്ട് നേടി.സഹകരണ മുന്നണിയിലെ ഏക അംഗമായ ബൈജു ജോൺ 2953വോട്ട് നേടി.

ജനാധിപത്യ ചേരിയോടൊപ്പം നിൽക്കാതെ സ്വാർഥ താൽപര്യങ്ങൾക്കു വേണ്ടി ഇടതുപക്ഷത്തോടൊപ്പം ചേർന്ന് മത്സരിച്ചതാണ് മാണി ഗ്രൂപ്പിന്റെ പരാജയത്തിന് കാരണമെന്നു് കോൺഗ്രസ് ബ്ളോക്ക് പ്രസിഡന്റ് റോയി ജോസഫ് എലിപ്പുലികാട്ട് അഭിപ്രായപ്പെട്ടു. മുത്തോലി സഹകരണ ബാങ്ക് തെരെഞ്ഞെടുപ്പിലും മാണിഗ്രൂപ്പ് ഐക്യജനാധിപത്യ മുന്നണിക്കെതിരെ സി.പി.എമ്മുമായി കൂട്ടുചേർന്നു് മത്സരിക്കുകയായിരുന്നെന്നും അദ്ദേഹം പറഞ്ഞു.

രാമപുരം ബാങ്ക് ഫലം ജനാധിപത്യ വിശ്വാസികൾക്ക് ശുഭ സൂചന നൽകുന്നതാണെന്നും.,ബാങ്കിനെ കുറിച്ച് പ്രചരിപ്പിച്ച അപവാദ പ്രചാരണങ്ങളെ ജനങ്ങൾ അർഹിക്കുന്ന അവജ്ഞയോടെ തള്ളി കളഞ്ഞിരിക്കയാണെന്നും ജനാധിപത്യ മുന്നണി നേതാവ് വി എ ജോസ് ഉഴുന്നാലിൽ പ്രസ്താവിച്ചു.

രാമപുരം ബാങ്ക് തെരെഞ്ഞെടുപ്പിൽ ഗുണ്ടായിസം വിലപ്പോവില്ല : ജോസഫ് വാഴക്കൻ


 പാലാ-രാമപുരം: ആസന്നമായ രാമപുരം സർവ്വീസ് സഹകരണ ബാങ്ക് തെരെഞ്ഞെടുപ്പിൽ ഭരണത്തിന്റെ തണലിൽ ഗുണ്ടായിസം നടത്തി ബാങ്ക് പിടിച്ചടക്കാമെന്നുള്ള വ്യാമോഹം വിലപ്പോവില്ലെന്ന് കെ.പി.സി.സി വക്താവും മുൻ എം.എൽ.എ യുമായ ജോസഫ് വാഴക്കൻ അഭിപ്രായപ്പെട്ടു .

രാമപുരം സഹകരണ ബാങ്ക് തെരെഞ്ഞെടുപ്പിൽ ജനാധിപത്യ മുന്നണിയുടെ തെരെഞ്ഞെടുപ്പ് സമാപന പൊതുയോഗം രാമപുരം ടൗണിൽ ഉദ്ഘാടനം ചെയ്യുകയായിരുന്നു വാഴയ്ക്കൻ.



ഐക്യ ജനാധിപത്യമുന്നണിയുടെ ഭാഗമായ കേരളാ കോൺഗ്രസ് (എം) ലെ ഒരു ചെറിയ വിഭാഗം രാമപുരത്ത് ഇടതുപക്ഷവുമായി ഒന്നിച്ച് ഒരു മുന്നണിയായി മത്സരിക്കുന്നതിനെ കുറിച്ച് താൻ ഐക്യമുന്നണി യോഗത്തിൽ ജോസ് കെ മാണിയോട് സംസാരിച്ചപ്പോൾ ഐക്യമുന്നണി വിട്ട് മത്സരിക്കുന്നതിനെ കുറിച്ച് തങ്ങൾക്കറിവില്ല എന്നാണ്‌ പ്രതികരിച്ചത്.രാമപുരം ബാങ്ക് രൂപീകരിച്ചത് യശ്ശശരീരനായ ശ്രീ എം.എം ജേക്കബ്ബ് മുൻകൈ എടുത്താണ്. എന്നാൽ നാളിത് വരെ കോൺഗ്രസ് ,കേരളാ കോൺഗ്രസ് മാത്രമെ രാമപുരം ബാങ്ക് ഭരിച്ച ചരിത്രമുള്ളൂ. അതിത്തവണയും ജനാധിപത്യ ശക്തികളുടെ കേന്ദ്രമായി രാമപുരം ബാങ്ക് നിലകൊള്ളുമെന്ന് വാഴക്കൻ കൂട്ടി ചേർത്തു.

പരാജയ ഭീതി പൂണ്ട ഇടതുപക്ഷവും, നമ്മുടെ ചില സുഹൃത്തുക്കളും പരിയാരം മോഡൽ തെരെഞ്ഞെടുപ്പ് നടത്താൻ കച്ചമുറുക്കുന്നത് ജനാധിപത്യ പാരമ്പര്യമുള്ള രാമപുരത്തെ വോട്ടർമാർ ചെറുത്ത് തോൽപ്പിക്കുമെന്ന് ജനാധിപത്യ മുന്നണിക്ക് നേതൃത്വം നൽകുന്ന വി.എ ജോസ് ഉഴുന്നാലിൽ അഭിപ്രായപ്പെട്ടു.നാൾ കഴിയുന്തോറും എതിരാളികൾ ഉന്നയിച്ച അഴിമതി ആരോപണങ്ങൾ അവർക്ക് തന്നെ വിനയായി തീരുന്ന കാഴ്ചയാണ് കണ്ടുകൊണ്ടിരിക്കുന്നതെന്ന് വി.എ ജോസ് പറഞ്ഞു .



രാമപുരം ബാങ്കിൽ ഇടതുപക്ഷ പതാക പാറിക്കാമെന്നു,ള്ളത് വെറും വ്യാമോഹമായി അവശേഷിക്കുമെന്ന് ഡി.സി സി വൈസ് പ്രസിഡന്റ് ബിജു പുന്നത്താനം അഭിപ്രായപ്പെട്ടു.

ജനാധിപത്യ മുന്നണിയുടെ ചിട്ടയായപ്രവർത്തന കണ്ട് ഹാലിളകിയ സി.പി.എം നേതൃത്വം നൽകുന്ന മുന്നണി ഇപ്പോൾ ഭരണത്തണലിൽ ഗുണ്ടായിസം നടത്തി ബാങ്ക് പിടിച്ചെടുക്കാമെന്ന് വീമ്പിളക്കുന്നത് അവരുടെ പാപ്പരത്വമാണ് വിളിച്ചോതുന്നതെന്ന് ഡി.സി.സി ജനറൽ സെക്രട്ടറി സി.ടി രാജൻ അഭിപ്രായപ്പെട്ടു.

രണ്ട് തവണ ഭവന സന്ദർശനം നടത്തുകയും, ഇന്നിന്റെ മാധ്യമമായ സോഷ്യൽ മീഡിയാ വഴിയും പ്രചണ്ഡമായ പ്രചരണമാണ് നടത്തുന്നതെന്നു് യൂത്ത് കോൺഗ്രസ് പാലാ നിയോജക മണ്ഡലം പ്രസിഡന്റ് റോബി ഊടുപുഴ,ബെന്നി കീത്താപ്പള്ളി തുടങ്ങിയവർ വേണാട് ന്യൂസിനോട് പറഞ്ഞു.

യോഗത്തിൽ ഡി.പ്രസാദ് ഭക്തിവിലാസ്,ടൈറ്റസ് മാത്യു ,സെല്ലി ജോർജ് ,കെ.കെ ശാന്താറാം, അനിതാ രാജു എന്നിവർ പ്രസംഗിച്ചു.

കേരളാ കോൺഗ്രസ് സെക്രട്ടറിയേറ്റ് മെംബറായ വി.എ ജോസ് ഉഴുന്നാലിൽ ,മഹിളാ കോൺഗ്രസ് ജില്ലാ വൈസ് പ്രസിഡന്റ് മോളിപീറ്റർ എന്നിവർ നയിക്കുന്ന ജനാധിപത്യ മുന്നണി പാനൽ തികഞ്ഞ ആത്മവിശ്വാസമാണ് പ്രകടിപ്പിക്കുന്നത്.

ഈ മാസം 29 നാണ് തെരെഞ്ഞെടുപ്പ് നടക്കുന്നത്.ശക്തമായ പോലീസ് ബന്തവസ് ഏർപ്പെടുത്തുമെന്ന് അറിയുന്നു.ഇതിലേക്കായി ക്യാമറ അടക്കമുള്ള സജ്ജീകരണങ്ങൾ ഒരുക്കിയിട്ടുണ്ട് .

രാമപുരം ബാങ്കിൽ ജനാധിപത്യ ശക്തികൾ ചേരിതിരിയുന്നത് നിർഭാഗ്യകരം : അഡ്വ:ബിജു പുന്നത്താനം



പാലാ: ആസന്നമായ രാമപുരം സർവ്വീസ് സഹകരണ ബാങ്ക് തെരെഞ്ഞെടുപ്പിൽ ജനാധിപത്യ കക്ഷികൾ ചേരിതിരിഞ്ഞ് മത്സരിക്കുന്നത് നിർഭാഗ്യകരമെന്ന് കോട്ടയം ജില്ലാ കോൺഗ്രസ് വൈസ് പ്രസിഡന്റ് അഡ്വക്കേറ്റ്ബിജു പുന്നത്താനം അഭിപ്രായപെട്ടു.ജനാധിപത്യ മുന്നണിയുടെ തെരെഞ്ഞെടുപ്പ് കൺവൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അഡ്വക്കേറ്റ്ബിജു പുന്നത്താനം.

ജനാധിപത്യ ചേരിയുടെ ഈറ്റില്ലമായ രാമപുരത്ത് സി.പി.എം നെ കൂടെ കൂട്ടി ബാങ്ക് പിടിച്ചെടുക്കാനുള്ള നീക്കം ജനാധിപത്യ ചേരിക്ക് ഭാവിയിൽ ആശയ കുഴപ്പമുണ്ടാക്കാനെ ഉപകരിക്കൂവെന്ന് അദ്ദേഹം കൂട്ടി ചേർത്തു.

ചരിത്രത്തിലെ ഏറ്റവും വാശിയേറിയ തെരെഞ്ഞെടുപ്പാണ് രാമപുരത്ത് നടക്കുന്നത്. കേരളാ കോൺഗ്രസ് (എം) രണ്ടു ചേരികളിലായാണ്‌ ഇവിടെ മത്സരിക്കുന്നത്. കേരളാ കോൺഗ്രസ് സെക്രട്ടറിയേറ്റ് മെംബറും മുൻ ബാങ്ക് പ്രസിഡന്റുമായിരുന്ന  വി.എ ജോസ്, ഉഴുന്നാലിൽ ന്റെയും.,മഹിളാ കോൺഗ്രസ് കോട്ടയം ജില്ലാ വൈസ് പ്രസിഡണ്ട്  മോളി പീറ്ററുടെയും.,കോൺഗ്രസ് കോട്ടയം ജില്ലാ ജനറൽ സെക്രട്ടറി സി ടി രാജന്റെയും  നേതൃത്വത്തിലാണ്  പ്രബലമായ വിഭാഗം  ജനാധിപത്യ മുന്നണി എന്ന പേരിൽ മത്സരിക്കുന്നത്.



മറുചേരിയിൽ കേരളാ കോൺഗ്രസ് (എം) മണ്ഡലം പ്രസിഡന്റും ബാങ്ക് മുൻ വൈസ് പ്രസിഡന്റുമായ  ബൈജു ജോൺ പുതിയിടത്ത്ചാലിയുടെ നേതൃത്വത്തിൽ സി.പി.എമ്മുമായി സഹകരിച്ചാണ്‌ സഹകരണ മുന്നണി എന്ന പേരിൽ  മത്സരിക്കുന്നത്.സിപിഎം ലോക്കൽ സെക്രട്ടറി  എം ടി ജാന്റീഷും ഈ പാനലിൽ മത്സരിക്കുന്നുണ്ട്.

എം.പി ശ്രീനിവാസിന്റെ നേതൃത്വത്തിൽ ബി.ജെ.പി നേതൃത്വത്തിലുള്ള എൻ.ഡി.എ സഖ്യവും മത്സര രംഗത്തുണ്ട്.

ജനാധിപത്യ മുന്നണിയിൽ കേരളാ കോൺഗ്രസ് ഏപ്പച്ചൻ വിഭാഗം എട്ട് സീറ്റിൽ മത്സരിക്കുമ്പോൾ സഹകരണ മുന്നണിയിലെ കേരളാ കോൺഗ്രസ് അപ്പച്ചൻ വിഭാഗത്തിന് ആറ്  സീറ്റ് മാത്രമെയുള്ളൂ.



റോസറി ഗ്രാമത്തിലുള്ള സെന്റ് തോമസ് ഹാൾ നിറഞ്ഞ് കവിഞ്ഞ യോഗത്തിൽ വി.എ ജോസ് ഉഴുന്നാലിൽ മത്സരാർത്ഥികളെ പരിചയപ്പെടുത്തി.


എം.എം ജേക്കബ്ബ് ഒന്നാം നമ്പരുകാരനായി ആരംഭിച്ച ഈ ബാങ്ക് എന്നും ജനാധിപത്യ ചേരിയോടൊപ്പമാണ് നിലകൊണ്ടിട്ടുള്ളതെന്നും അത് അരക്കിട്ടുറപ്പിച്ചു കൊണ്ടുള്ള വിജയമാവും നമ്മൾ നേടാൻ പോവുന്നതെന്നും മുൻ ബാങ്ക് പ്രസിഡന്റ് കൂടിയായ വി.എ ജോസ് ഉഴുന്നാലിൽ തെരെഞ്ഞെടുപ്പ് കൺവൻഷനിൽ പ്രസ്താവിച്ചു.

ഈ മാസം 29 നാണ് രാമപുരം സഹകരണ ബാങ്കിലെ തെരെഞ്ഞെടുപ്പ്.കഴിഞ്ഞ മാസം 21 നു തെരെഞ്ഞെടുപ്പ് നടക്കാനിരിക്കെ ഹൈകോടതിയിൽ നിന്നും കേരള കോൺഗ്രസിലെ അപ്പച്ചൻ ഗ്രൂപ്പ് സ്റ്റേ വാങ്ങിയതിനാലാണ് തെരെഞ്ഞെടുപ്പ് നീണ്ടത്..

നിർദ്ധന യുവതിയുടെ ഒറ്റയാൾ പോരാട്ടത്തിന്റെ വിജയം സമൂഹത്തിനു മാതൃകയായി 

 എരുമേലി : ബസ് സ്റ്റാൻഡും മൂത്രപ്പുരയും ഇല്ലെന്ന സ്ട്രീകളടക്കമുള്ള യാത്രക്കാരുടെ സങ്കടം വെള്ള പേപ്പറിൽ സ്വന്തം കൈപ്പടയിലെഴുതി 1001 പേരെ നേരിൽ കണ്ട് പരാതി കാട്ടി ഒപ്പുകൾ വാങ്ങി മനുഷ്യാവകാശ കമ്മീഷനെ അറിയിച്ച രജനിയുടെ പോരാട്ടം വിജയം കണ്ടു. എരുമേലി പ്രൈവറ്റ് ബസ് സ്റ്റാൻഡിൽ പൊതു ശൗചാലയം പ്രവർത്തിപ്പിക്കണമെന്നും മുക്കൂട്ടുതറയിൽ ബസ് സ്റ്റാൻഡും ശൗചാലയവും നിർമിക്കണമെന്നും കമ്മീഷൻ കഴിഞ്ഞ ദിവസം നടന്ന സിറ്റിങിൽ ഉത്തരവിട്ടു. 


എരുമേലി ഗ്രാമ പഞ്ചായത്തിന്റെ എതിർവാദങ്ങൾ തള്ളിയാണ് കമ്മീഷൻ ജസ്റ്റിസ് ആന്റണി ഡൊമിനിക് ഉത്തരവിട്ടത്. കൂലിപ്പണിക്കാരിയും നിർധനയുമായ മുട്ടപ്പള്ളി ചെറുകുന്നേൽ രജനി മോഹനൻ സമർപ്പിച്ച ഹർജിയിലാണ് ഉത്തരവ്. എരുമേലി പ്രൈവറ്റ് ബസ് സ്റ്റാൻഡിൽ പൊതു ശൗചാലയം പ്രവർത്തിപ്പിക്കണമെന്നാവശ്യപ്പെട്ട് ഇതിന് മുമ്പും രജനി ഒറ്റയാൾ പോരാട്ടം നടത്തിയിരുന്നു. സ്റ്റാൻഡിൽ സമരം നടത്തിയ രജനിക്കെതിരെ അന്ന് പോലീസ് കേസ് ഏടുത്തിരുന്നു . ഇത് പിന്നീട് കോടതി തള്ളി. ബസുകളിൽ കയറി യാത്രക്കാരായ സ്ത്രീകളിൽ നിന്നും ഒപ്പുകൾ ശേഖരിച്ച് വനിതാ കമ്മീഷന് നൽകിയ പരാതിയിൽ കമ്മീഷൻ അംഗം നേരിട്ടെത്തി തെളിവെടുപ്പ് നടത്തിയിരുന്നു. 

വനിതാ കമ്മീഷൻ നിർദേശം നൽകിയാണ് അന്ന് ശൗചാലയത്തിന്റെ പ്രവർത്തനം വർഷങ്ങൾക്ക് ശേഷം പുനരാരംഭിച്ചത്. എന്നാൽ മാസങ്ങൾ നീളും മുമ്പേ ശൗചാലയം അടഞ്ഞു. സെപ്റ്റിക് ടാങ്ക് ചോർന്നൊലിക്കുന്നതായിരുന്നു കാരണം. തുടർന്നാണ് 1001 പേർ ഒപ്പിട്ട പരാതി നാല് മാസം മുമ്പ് മനുഷ്യാവകാശ കമ്മീഷന് രജനി നൽകിയത്. പരാതിയുടെ ഹിയറിങ്ങിൽ പഞ്ചായത്തിന് വേണ്ടി ഹാജരായത് പെൻഷൻ സെക്ഷനിലെ വനിതാ ജീവനക്കാരിയായിരുന്നു. സെപ്റ്റിക് ടാങ്ക് പുനർ നിർമിക്കാൻ പഞ്ചായത്തിന്റെ പക്കൽ ഫണ്ട്‌ ഇല്ലെന്നാണ് ഇവർ അറിയിച്ചത്. 

.ഇത് പച്ചക്കള്ളമാണെന്ന് കമ്മീഷനെ രജനി അറിയിച്ചു. ജില്ലയിൽ ഏറ്റവും വിസ്തൃതിയും 23 വാർഡുകൾ ഉള്ളതുമായ സ്പെഷ്യൽ ഗ്രേഡ് പഞ്ചായത്താണ് എരുമേലിയെന്നും ലക്ഷക്കണക്കിന് ശബരിമല തീർത്ഥാടകർ ഓരോ വർഷവും എത്തുന്നതിനാൽ അടിസ്ഥാന സൗകര്യങ്ങൾക്ക് സർക്കാർ പ്രത്യേകമായി ഫണ്ട് അനുവദിക്കുന്നുമുണ്ടെന്നും രജനി പറഞ്ഞു. ശബരിമല പ്രധാന പാതയിൽ എരുമേലിയിലെ തിരക്കേറിയ ടൗൺ ആയ മുക്കൂട്ടുതറയിൽ നാളിതുവരെയായി ബസ് കാത്തിരിപ്പ് കേന്ദ്രവും മൂത്രപ്പുരയും ബസ് സ്റ്റാൻഡും ഇല്ല.

ആജീവനാന്ത സോഷ്യലിസ്റ്റ് കെ കെ പൊന്നപ്പന്  അനന്തപുരിയുടെ ആദരം




തിരുവനന്തപുരം: എക്കാലത്തും സോഷ്യലിസ്റ്റ് ചേരിയിൽ നിലയുറപ്പിച്ച മാതൃകാ സോഷ്യലിസ്റ്റായ പ്രജാ സോഷ്യലിസ്റ്റ് പാർട്ടിയുടെ സംസ്ഥാന ചെയർമാൻ ശ്രീ കെ.കെ പൊന്നപ്പന് തലസ്ഥാന നഗരം ആജീവനാന്ത സോഷ്യലിസ്റ്റ് പുരസ്ക്കാരം നൽകി ആദരിച്ചു.

എൻ.ഡി.പി സാംസ്ക്കാരിക വേദിയാണ് പുരസ്ക്കാരം നൽകിയത്.തിരുവനന്തപുരം പ്രസ് ക്ലബ്ബ് ഹാളിൽ ചേർന്ന യോഗത്തിൽ ബി.ജെ.പി യുടെ തല മുതിർന്ന നേതാവ് ഒ.രാജഗോപാൽ എം.എൽ.എ മെമന്റോ നൽകി ആദരിച്ചു.
ചടങ്ങിൽ പി.സി ജോർജ്.എ. വിൻസെന്റ് എന്നീ എം.എൽ.എ മാരും.,എൻ ഡി പി പ്രേമാനന്ദൻ.,ബി ജെ പി തിരുവനന്തപുരം ജില്ലാ സെക്രെട്ടറി എസ് സുരേഷ്.,പി എസ് പി ജില്ലാ പ്രസിഡണ്ട് അഡ്വക്കേറ്റ് എസ് കെ നായർ.,പി എസ് പി ജില്ലാ ജനറൽ സെക്രെട്ടറി പോത്തൻകോട് ശ്രീകണ്ഠൻ നായർ എന്നിവരും പ്രസംഗിച്ചു.


 ഞങ്ങളൊക്കെ പല പാർട്ടികളും മാറിയിട്ടുള്ളവരാ പക്ഷെ കെ-കെ പൊന്നപ്പനെ പോലുള്ളവർ എന്നും സോഷ്യലിസ്റ്റ് ചേരിയിൽ നിന്നിട്ടുള്ളത് ഒരു അപൂർവ്വ സംഭവമാണെന്ന് പി.സി ജോർജ് എം.എൽ.എ അഭിപ്രായപ്പെട്ടു

സത്യത്തിനും നീതിക്കും മൂല്യങ്ങൾ നഷ്ടപെട്ട ഇക്കാലത്ത് മൂല്യാധിഷ്ടിത രാഷ്ടീയത്തിന്റെ വക്താവായി മാറിയതാണു് പൊന്നപ്പന് ഇത് പോലുള്ള അവാർഡുകൾ കിട്ടുവാനിടവന്നതെന്ന് ഒ.രാജഗോപാൽ എം.എൽ.എ തന്റെ പ്രസംഗത്തിൽ ചൂണ്ടി കാട്ടി.

കെ.കെ പൊന്നപ്പനെ പോലുള്ള പൊതുപ്രവർത്തകരെയാണ് ആധുനിക കേരളത്തിന് ഇന്ന് അത്യന്താപേക്ഷിതമായിരിക്കുന്നതെന്ന് എ.വിൻസൻറ് എം.എൽ.എ പ്രസ്താവിച്ചു.

മറ്റുള്ള പാർട്ടികളിലേക്ക് പലരും ക്ഷണിച്ചപ്പോഴും, ഉന്നത സ്ഥാനങ്ങൾ വാഗ്ദാനം ചെയ്തപ്പോഴും ആ പ്രലോഭനങ്ങളെയെല്ലാം അതിജീവിച്ച് തന്റെ പ്രജാ സോഷ്യലിസ്റ്റ് പാർട്ടിയുമായി മുന്നോട്ടു പോകാൻ തീരുമാനിച്ചു കൊണ്ട് അടിയുറച്ച സോഷ്യലിസ്റ്റായി നിന്ന പൊന്നപ്പൻ ചേട്ടനെ പോലുള്ളവർ കേരളത്തിന്റെ സുകൃതമാണെന്ന് കേരളാ കോൺഗ്രസ് (പി.സി തോമസ്) സംസ്ഥാന ജനറൽ സെക്രട്ടറി രാജൻ കണ്ണാട്ട് അഭിപ്രായപ്പെട്ടു.

അധികാരം കൈയ്യിൽ ലഭ്യമായ പ്പോഴെല്ലാം സാധാരണക്കാരന്റെ ഉന്നമനത്തിനായി നിലകൊണ്ടതാണ് തന്റെ വിജയമെന്ന് നന്ദി പ്രകാശന പ്രസംഗത്തിൽ കെ.കെ.പൊന്നപ്പൻ പറഞ്ഞു. അഴിമതിയുടെ കറ ഒരിക്കൽ പോലും എന്നെ തൊട്ടു തീണ്ടിയിട്ടില്ല. ഫോം മാറ്റിംഗ്സ് കോർപ്പറേഷൻ ചെയർമാനായിരിക്കെ തൊഴിലാളികൾക്കും, ജീവനക്കാർക്കും ഗുണകരമായ ധാരാളം സേവന പ്രവർത്തികൾ ചെയ്യാനായതാണ് തന്റെ നേട്ടമെന്നും കെ.കെ. പൊന്നപ്പൻ കൂട്ടിച്ചേർത്തു.


കെ.എസ്.ആർ.ടി.സി ഉപദേശക സമിതി അംഗമായി കാനം രാജേന്ദ്രൻ ,വി.എസ് അച്ചുതാനന്ദൻ എന്നിവരോടൊപ്പം പ്രവർത്തിച്ചിട്ടുണ്ട്. പതിനെട്ടോളം കോർപ്പറേഷൻ ബോർഡംഗമായി പ്രവർത്തിച്ചിട്ടുള്ള ഇദ്ദേഹം 24 വിദേശ രാജ്യങ്ങളും സന്ദർശിച്ചിട്ടുണ്ട്.

ആലപ്പുഴ വികസന സമിതിയംഗം.ആലപ്പുഴ മെഡിക്കൽ കോളേജ് ഉപദേശ സമിതിയംഗം, ആലപ്പുഴ ആയുർവ്വേദ ആശുപത്രി ഉപദേശക സമിതിയംഗം എന്നീ നിലകളിൽ പ്രവർത്തിച്ചിട്ടുണ്ട്...


ലിനിയുടെയും ; നൗഷാദിന്റെയും കാര്യത്തിൽ സർക്കാർ കാണിച്ച മാതൃക.,പ്രളയ രക്ഷാ പ്രവർത്തനത്തിലും.,പ്രളയാനന്തര ശുചീകരണ പ്രവർത്തനത്തിനിടയിലും മരണപ്പെട്ട സന്നദ്ധ പ്രവർത്തകരുടെ ആശ്രിതരോട് സർക്കാർ  സ്വീകരിക്കണം .കെ എസ് സി (എം)സംസ്ഥാന പ്രസിഡണ്ട് അഡ്വക്കേറ്റ് രാഖേഷ്‌ ഇടപ്പുര.


കോട്ടയം: പ്രളയക്കെടുതിയിൽ രക്ഷാപ്രവർത്തനത്തിനിടെ മരിച്ചവരുടെ ആശ്രിതർക്കും, പ്രളയാനന്തരം ശുചീകരണ പ്രവർത്തനങ്ങളിൽ ഏർപ്പെട്ട് എലിപ്പനി ഉൾപ്പെടെയുള്ള മാരക രോഗങ്ങൾ പിടിപെട്ട് മരിച്ചവരുടെ ആശ്രിതർക്കും മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അടിയന്തിരമായി സഹായധനവും.,ജോലിയും  നൽകണമെന്നും.,അടുത്ത മന്ത്രിസഭാ യോഗത്തിൽ തന്നെ അതിനു വേണ്ട അനുമതി നൽകണമെന്നും  കെ.എസ്.സി (എം) സംസ്ഥാന പ്രസിഡന്റ് അഡ്വക്കേറ്റ് രാഖേഷ് ഇടപ്പുര ആവശ്യപ്പെട്ടു.

കേരളം കണ്ട ഏറ്റവും വലിയ പ്രളയക്കെടുതിയിൽ നിരവധി സഹോദരങ്ങൾ മരണപ്പെടുകയുണ്ടായി. ആയത് കൂടാതെ നിരവധി സന്നദ്ധ പ്രവർത്തകർ രക്ഷാപ്രവർത്തനത്തിനിടെയും, പ്രളയാനന്തര ശുചീകരണ പ്രവർത്തനത്തിൽ എലിപ്പനിയുൾപ്പെടെയുള്ള മാരക രോഗങ്ങൾ, ബാധിച്ച് മരണപ്പെടുകയുണ്ടായി. ഇങ്ങനെ മരണപ്പെട്ടവരുടെ കുടുംബാംഗങ്ങൾക്ക് നിപാ വൈറസ് ബാധിച്ചവരെ  ചികിത്സിക്കുന്നതിനിടെ മരണപ്പെട്ട പേരാമ്പ്രയിലെ നേഴ്സ് ലീനി യുടെ കുടുംബത്തിനും, കോഴിക്കോട് മാൻഹോളിൽ വീണവരെ രക്ഷപ്പെടുത്തുന്നതിനിടയിൽ മരണപ്പെട്ട നൗഷാദിന്റെ കുടുംബത്തിനും  സഹായധനവും, അവകാശികൾക്ക് ജോലിയും നൽകിയ മാതൃക  സ്വീകരിക്കാവുന്നതാണ്.

ഇതു സംബന്ധിച്ച് കെ.എസ്.സി (എം) മുഖ്യമന്ത്രിക്കും, ധനകാര്യ മന്ത്രിക്കും നിവേദനം നൽകുന്നതാണെന്ന് കെ എസ് സി (എം)സംസ്ഥാന പ്രസിഡണ്ട് അഡ്വക്കേറ്റ് രാഖേഷ്‌ ഇടപ്പുര അറിയിച്ചു

മലയാള മണ്ണിൽ കാരുണ്യ മഴയായ് പെയ്തിറങ്ങിയ നെതർലാൻഡ് സ്വദേശികൾക്ക് യാത്രാമംഗളമേകി.



 പാലാ: പ്രളയദുരിതത്തില്‍ കഷ്ടപ്പെടുന്ന ദൈവത്തിന്റെ സ്വന്തം നാട്ടിലെ ജനങ്ങള്‍ക്ക്  സ്വാന്ത്വനമേകിയ നെതര്‍ലാന്റ് സ്വദേശികള്‍ക്ക് ഹൃദ്യമായ യാത്രയയിപ്പ്. പാലായിലെ ശാന്തി യോഗാ സെന്ററില്‍ ഒരു മാസത്തെ യോഗാ പരിശീലന കോഴ്‌സില്‍ ചേരാനാണ് നെതര്‍ലാന്റ് സ്വദേശികളായ മോനിക്കുവും മാര്‍ലിയും പാലായില്‍ എത്തിയത്. ഇതിനിടെയാണ് കനത്ത മഴയും പ്രളയക്കെടുതിയും കേരളത്തെ പിടിച്ചുലച്ചത്. ദുരിതം കേട്ടറിഞ്ഞ ഇവര്‍ യോഗാ സെന്റര്‍ ഡയറക്ടര്‍ അഭിലാഷ് ഗിരീഷിനും മറ്റുള്ളവര്‍ക്കുമൊപ്പം പ്രളയമേഖലകള്‍ സന്ദര്‍ശിച്ചു. തുടര്‍ന്ന് പ്രളയബാധിതരെ സഹായിക്കാന്‍ തീരുമാനമെടുക്കുകയായിരുന്നു. വിവിധ മേഖലകളില്‍ വസ്ത്രങ്ങള്‍, ഭക്ഷണങ്ങള്‍, മരുന്നുകള്‍ മുതലായവ എത്തിച്ചു നല്‍കി. ഇതിനിടെ തിരുവനന്തപുരത്ത് പ്രളയത്തിലകപ്പെട്ട മൃഗങ്ങള്‍ക്കു ഭക്ഷ്യവസ്തുക്കള്‍ എത്തിച്ചു നല്‍കുകയും ചെയ്തു.

പാലായില്‍ മഹാത്മാഗാന്ധി നാഷണല്‍ ഫൗണ്ടേഷന്റെ പ്രളയ ദുരിതാശ്വാസ വിഭവ സമാഹരണ യജ്ഞത്തിലേയ്ക്ക് ഒരു ലക്ഷത്തില്‍പരം രൂപയുടെ വസ്ത്രങ്ങള്‍ സംഭാവന ചെയ്തു. അഞ്ചു ലക്ഷത്തില്‍പരം രൂപയുടെ വിഭവങ്ങളാണ് ഇവര്‍ വിവിധ മേഖലകളില്‍ സംഭാവന ചെയ്തത്. 

പരിശീലനം പൂര്‍ത്തിയാക്കി സ്വദേശത്തേയ്ക്ക് മടങ്ങുന്ന മോനിക്കുവിനും മാര്‍ലിക്കും മഹാത്മാഗാന്ധി നാഷണല്‍ ഫൗണ്ടേഷന്റെ നേതൃത്വത്തില്‍ ശാന്തിയോഗാ സെന്ററില്‍ യാത്രയയപ്പ് നല്‍കി. സമ്മേളനം പി.സി.ജോര്‍ജ് എം എല്‍ എ ഉദ്ഘാടനം ചെയ്തു. മോനിക്കുവിന്റെയും മാര്‍ലിയുടെയും കാരുണ്യ പ്രവര്‍ത്തികള്‍ മാതൃകാപരമാണെന്ന് പി.സി.ജോര്‍ജ് അഭിപ്രായപ്പെട്ടു. അതിര്‍വരമ്പുകളില്ലാത്ത ഇവരുടെ മാനവസ്‌നേഹം മഹത്തരമാണെന്നും അദ്ദേഹം കൂട്ടിച്ചേര്‍ത്തു.

ഫൗണ്ടേഷന്‍ ചെയര്‍മാന്‍ എബി ജെ. ജോസ് അധ്യക്ഷത വഹിച്ചു. സെക്രട്ടറി സാംജി പഴേപറമ്പില്‍, ശാന്തി യോഗാ സെന്റര്‍ ചെയര്‍മാന്‍ കെ.പി. മോഹന്‍ദാസ്, ഡയറക്ടര്‍ അഭിലാഷ് ഗിരീഷ് എന്നിവര്‍ പ്രസംഗിച്ചു. ഫൗണ്ടേഷന്‍ തയ്യാറാക്കിയ പ്രശംസാപത്രം മോനിക്കു,മാര്‍ളി എന്നിവര്‍ക്ക് പി.സി.ജോര്‍ജ് സമ്മാനിച്ചു.        

പാചക വാതകത്തിന്റെ വില വർദ്ധിപ്പിച്ചത് ജന വിരുദ്ധം : പി.ജെ. ജോസഫ്


കോട്ടയം: ജനങ്ങളുടെ നിത്യോപയോഗ സാധനങ്ങളിലുൾപ്പെടുന്ന ഗ്യാസിന്റെ വില വർദ്ധിപ്പിച്ച നടപടി ജന വിരുദ്ധമെന്ന് കേരളാ കോൺഗ്രസ് (എം) വർക്കിംഗ് ചെയർമാൻ പി.ജെ ജോസഫ് പ്രസ്താവിച്ചു .
,,
സബ്സിഡി സിലിണ്ടറിന് 30,50 രൂപയും വാണിജ്യ സിലിണ്ടറുകൾക്ക് 47.50 രൂപായും വർദ്ധിപ്പിച്ചത് സാധാരണക്കാരന്റെ കുടുംബ ബജറ്റ് തകർക്കാനും, നാട്ടിലാകെ വിലക്കയറ്റമുണ്ടാക്കാനും മാത്രമെ ഉതകൂ എന്ന് പി.ജെ ജോസഫ് പറഞ്ഞു.

ഇന്ത്യയിൽ പ്രത്യേകിച്ച് കേരളത്തിൽ പ്രകൃതി ദുരന്തങ്ങൾ മൂലം ജനങ്ങൾ ദുരിതമനുഭവിക്കുമ്പോൾ.,അതിനോട് സഹാനുഭൂതി പോലും പ്രകടിപ്പിക്കാതെ തികച്ചും ഏകപക്ഷീയമായ തീരുമാനമാണ് കേന്ദ്രവും.,ഓയിൽ കമ്പനികളും സ്വീകരിച്ചിട്ടുള്ളതെന്ന് അദ്ദേഹം  പറഞ്ഞു 

ദിവസേന പെട്രോളിന്റെയും, ഡീസലിന്റെയും വില വർദ്ധിപ്പിച്ച് ജന ജീവിതം ദുസ്സഹമാക്കുന്ന കേന്ദ്ര സർക്കാർ ഗ്യാസിന്റെ വില വർദ്ധനവ് പിൻവലിക്കണമെന്ന് പി.ജെ ജോസഫ് ആവശ്യപ്പെട്ടു.

പ്രളയം വിറ്റ് കാശാക്കാന്‍ വിവിധ സംഘടനകള്‍രംഗത്ത്.തട്ടിപ്പിനായി ബൈബിൾ വാക്യവും 

  
തിരുവനന്തപുരം :പ്രളയം വിറ്റ് കാശാക്കാന്‍ വിവിധ സംഘടനകള്‍  മുഖ്യമന്ത്രിയുടെ ദുരിതാശ്വാസ നിധിയില്‍ പണം നല്‍കാതെ സ്വന്തം നിലയില്‍ പണപ്പിരിവ് നടത്തി കീശ വീര്‍പ്പിക്കാന്‍ ഒരുങ്ങി പെന്തകൊസ്റ്റ്‌ സംഘടനാ നേതൃത്വങ്ങള്‍.മുഖ്യമന്ത്രിയുടെ ദുരിതാശ്വാസ നിധിയില്‍ പണം അയച്ചാല്‍ അത് തങ്ങളുടെ ഇടയില്‍ ഉള്ള ആളുകള്‍ക്ക് ലഭിക്കില്ല എന്നുള്ള വ്യാജ പ്രചരണങ്ങള്‍ വിദേശത്തും,സ്വദേശത്തും ഉള്ള സമ്പന്നരുടെ ഇടയില്‍ വരുത്തി തീര്‍ത്ത്‌ ഫണ്ടുകള്‍ സ്വന്തമാക്കി മുക്കുവാനുള്ള ശ്രമങ്ങള്‍ അണിയറയില്‍ രഹസ്യമായി ഒരുങ്ങിയതായി പറയപ്പെടുന്നു.വലിയ സാമ്പത്തിക സ്ഥിതിയുള്ള ഈ സംഘടനകള്‍ തങ്ങളുടെ സ്വാധീനം ഉപയോഗിച്ച് വിദേശത്തും സ്വദേശത്തും പണപ്പിരിവുകള്‍ പലതും നടത്തി തുച്ഛമായ കാര്യങ്ങള്‍ സഭയിലുള്ളവര്‍ക്ക് കൊടുത്തിട്ട്  ബാക്കി സംഘടനാ തലപ്പത്തുള്ളവര്‍ സ്വന്തമാക്കുകയാണ് പതിവ് എന്ന് പറയപ്പെടുന്നു. 

പ്രളയം കഴിഞ്ഞു ചെങ്ങന്നൂര്‍ ആസ്ഥാനമായി പ്രവര്‍ത്തിക്കുന്ന പ്രമുഖ സംഘടന പാണ്ടനാട് ഉള്ള സഭയിലെ ആളുകളെ തിരിഞ്ഞു നോക്കിയില്ല എന്ന് ക്രൈസ്തവ നാദം എന്ന പത്രം പറയുന്നു.കൂടാതെ വിവിധ സ്ഥലങ്ങളില്‍ നിന്നും ദുരിതാശ്വാസത്തിന് എത്തിയ സാധനസാമഗ്രികളും പണവും മറ്റും തങ്ങളുടെ പിണിയാളുകള്‍ക്കും,എതിര്‍ത്തു സംസാരിച്ചവര്‍ക്കും നൽകി  അവരുടെ വായടച്ചു ..എന്നാല്‍ ഭൂരിപക്ഷം വരുന്ന ദുരിത ബാധിതര്‍ക്ക് വിതരണം ചെയ്തില്ല എന്നും പറയപ്പെടുന്നു. വന്ന സാധനങ്ങള്‍ തന്നെ ഇത് നല്‍കിയ സംഘനകളെ പരാമര്‍ശിക്കാതെ ഒന്നും ചെയ്യാത്ത ചാരിറ്റി ഡിപ്പാര്‍ട്ട്മെന്റിന്റെ പേരില്‍ ആക്കി ആണ് വിതരണം ചെയ്തത് ഇതും പ്രതിഷേധത്തിന് ഇടയാക്കിയിട്ടുണ്ട്.

പ്രളയ ബാധിതരെ സഹായിക്കുവാന്‍ എന്ന പേരിലാണ് സമ്പന്നരുടെ ഇടയില്‍ പണപ്പിരിവിനു പെന്തകൊസ്ത് സഭകളുടെ നേതൃത്വങ്ങള്‍ ശ്രമിക്കുന്നത്.സ്വന്തം അണികള്‍ പ്രളയത്തില്‍ അകപ്പെട്ടപ്പോള്‍ തിരിഞ്ഞു നോക്കാന്‍ തയ്യാറാകാത്ത നേതാക്കളുടെ ആളുകള്‍ ആണ് ഇപ്പോള്‍ പിരിവിനു ഇറങ്ങിയിരിക്കുന്നത്.

മനശാസ്ത്രപരമായി ഇടപെട്ടു അണികളെ തട്ടിക്കുവാന്‍ ഇക്കൂട്ടര്‍ക്ക്‌ നല്ല കഴിവാണ് അതിനായി ചില ബൈബിള്‍ വാക്യങ്ങള്‍ കൂട്ടു പിടിച്ചു വന്‍ തട്ടിപ്പിന് ഒരുങ്ങുന്നതായി ആണ് അറിയാന്‍ കഴിഞ്ഞത്. അതില്‍ പ്രധാനം  ഇടം കൈ ചെയ്യുന്നത് വലം  കൈ അറിയരുത് എന്ന വാക്യം ആണ് അതിനാല്‍ എത്ര രൂപ നല്‍കി എന്ന് അണികളും സാധാരണ പറയില്ല. അതാണ്‌ ഇക്കൂട്ടര്‍ക്കുള്ള വിജയവും. തങ്ങളുടെ തട്ടിപ്പിന് പറ്റുന്ന ബൈബിള്‍ വാക്യങ്ങള്‍ സഭാ വിശ്വാസികളെ വിശ്വസിപ്പിക്കുകയും.ചോദ്യം ചെയ്യുന്ന അണികളെ ദൈവകോപം ഉണ്ടാകുമെന്ന് പറഞ്ഞു  പേടിപ്പിച്ചു കൂടെ നിര്‍ത്തുന്നതില്‍ വിജയിച്ചവരാണ് ഇക്കൂട്ടര്‍.നിന്നെ പോലെ നിന്റെ അയൽക്കാരനെയും സ്നേഹിക്കണമെന്ന ബൈബിൾ വാക്യം പറഞ്ഞാണ് ഇവർ സംഭാവന സ്വീകരിക്കുന്നത്.സുനാമി കാലത്ത് വൻ വിജയം നേടിയ ഒരു തട്ടിപ്പാണിത്.

പാസ്റ്റര്‍മാരില്‍ ബ്ലേഡ്‌ പണം കൊടുക്കന്നവര്‍, റിയല്‍എസ്റ്റേറ്റ്‌ നടത്തുന്നവര്‍ തുടങ്ങി ബാര്‍ മുതലാളിമാര്‍ വരെ ഉണ്ടെന്ന് പറയപ്പെടുന്നു. ഓരോ കാരണങ്ങള്‍ പറഞ്ഞു ഇവര്‍ സമ്പന്നരായ വിശ്വാസികളെ തട്ടിച്ചു പണക്കാര്‍ ആകും. മാത്രവുമല്ല തങ്ങള്‍ക്ക് എതിരെ സംസാരിക്കുന്നവരെ ആത്മീയ ഭീഷണി, പണം, മസില്‍ പവര്‍,കേസ് ഇവയില്‍ കൂടി ഒതുക്കാനും ഇക്കൂട്ടര്‍ക്ക്‌ നല്ല കഴിവാണ്.അത് കാരണം പേടിച്ചു ഇവര്‍ക്കെതിരെ സംസാരിക്കുവാന്‍ ആരും തയ്യാര്‍ ആവില്ല.തെരഞ്ഞെടുപ്പ്‌ വരുമ്പോള്‍ ഇവര്‍ ഗുണ്ടകള്‍ക്ക് നാണക്കേട് ഉണ്ടാക്കുന്ന നിലയില്‍ പ്രവര്‍ത്തിക്കുവാനും ജയിക്കുവാന്‍ എന്ത് കുതന്ത്രം പ്രയോഗിക്കാനും ഒരു മടിയും ഇക്കൂട്ടര്‍ക്ക്‌ ഇല്ല.ഇവരുടെ സംഘടനകളില്‍ വിശ്വാസികള്‍ എന്നറിയപ്പെടുന്ന അണികള്‍ക്ക്‌ ഭരണ പങ്കാളിത്തമോ ഇവര്‍ക്കെതിരെ സംസാരിക്കുവാനൊ അധികാരം ഇല്ല.ആരെങ്കിലും വിരുദ്ധമായി സംസാരിച്ചാല്‍ എല്ലാരും ഒറ്റക്കെട്ടായി എതിര്‍ക്കുകയും അവരെ ഒതുക്കുകയും ചെയ്യും.


പ്രളയ കാലത്ത്  ഒറ്റപ്പെട്ട നേതാക്കന്മാരില്‍ നന്നായി പ്രവര്‍ത്തിച്ചത് സ്വയം പ്രളയത്തില്‍ അകപ്പെടുകയും രക്ഷപ്പെട്ട ശേഷം നന്നായി ദുരിതാശ്വാസ പ്രവര്‍ത്തനം ചെയ്തത് പാസ്റ്റര്‍ കെ.സി ജോണ്‍ ആണെന്ന് പറയപ്പെടുന്നു. ചില സഭകളും,സംഘടനകളും തങ്ങളുടെ ഹാളുകള്‍ പേരിന് തുറന്നു കൊടുത്തത് ഒഴിച്ചാല്‍ ബാക്കി ഉള്ളവര്‍ തുറന്നു കൊടുക്കുകയോ ദുരിത ബാധിതര്‍ക്ക് വേണ്ട സഹായങ്ങള്‍ നല്‍കുവാനോ തയ്യാര്‍ ആവാതെ നിസ്സംഗരായിരുന്നു.റാന്നി മുങ്ങിയപ്പോള്‍ പ്രസംഗത്തില്‍ പ്രസിദ്ധനായ ഒരു മെത്രാന്‍ പാസ്റ്റര്‍ ഹാള്‍ അഴുക്കാകും അത് കൊണ്ട് തുറന്നു കൊടുക്കാന്‍ പറ്റില്ല എന്ന് പറഞ്ഞതായി ഒരു പ്രമുഖ പെന്തക്കോസ്തു ഗ്രൂപ്പിലെ ചര്‍ച്ചയില്‍ അറിയാന്‍ കഴിഞ്ഞു. തുറന്നു കൊടുത്തവരില്‍ തന്നെ ഭൂരിഭാഗവും അവരുടെ സഭയിലുള്ള ഒന്നോ രണ്ടോ പെന്തക്കോസ്തു കുടുംബങ്ങളെ മാത്രം ആണ് പ്രവേശിപ്പിച്ചത്. എന്നിട്ട് ദുരിതാശ്വാസ ക്യാമ്പ്‌ എന്ന് പേരും നല്‍കി.

പെന്തകൊസ്തില്‍ പ്രസിദ്ധമായ ഒരു സന്നദ്ധ സംഘടന അവര്‍ക്ക്‌ വിശാലമായ ഹാളുകള്‍ പ്രളയ ബാധിത പ്രദേശത്ത്‌ ഉണ്ടായിട്ടും ഒന്നും തന്നെ ചെയ്തില്ല. ചെങ്ങന്നൂര്‍ ആസ്ഥാനമാക്കി പ്രവര്‍ത്തിക്കുന്ന ഒരു സംഘടനക്ക് പൂനയില്‍ നിന്നും ദുരിതാശ്വാസത്തിന് വന്ന ലക്ഷക്കണക്കിന് രൂപയുടെ  സാധനസാമഗ്രികളും പണവും മറ്റും തങ്ങളുടെ പിണിയാളുകള്‍ക്കും,എതിര്‍ത്തു സംസാരിച്ചവര്‍ക്കും മാത്രം നല്‍കി  അവരുടെ വായടച്ചു എന്നാല്‍ ഭൂരിപക്ഷം വരുന്ന ദുരിത ബാധിതര്‍ക്ക് വിതരണം ചെയ്തില്ല എന്ന് അന്വേഷണത്തില്‍ അറിയാന്‍ കഴിഞ്ഞു.

പെന്തകൊസ്തിലെ അനീതികളെ ചോദ്യം ചെയ്യാന്‍ ഒരു കൂട്ടം ചെറുപ്പക്കാര്‍ ഉണ്ടാക്കിയതും, മുഖ്യ പെന്തക്കോസ്ത് സംഘടനകളുടെ പല അഴിമതിക്കാരായ നേതാക്കളുടെയും കണ്ണിലെ കരടായ   മലയാളി പെന്തകൊസ്ത് ഫ്രീ തിങ്കേഴ്സ്  (എം.പി.എഫ്.ടി) എന്ന പ്രസിദ്ധ ഫേസ്ബുക്ക് ഗ്രൂപ്പില്‍ നടന്ന ചില ചര്‍ച്ചകളില്‍ നിന്നും മനസിലാക്കാന്‍ കഴിയും.

മുഖ്യധാരാ സംഘടനകള്‍,സഭകള്‍ എന്തൊക്കെ ദുരിതാശ്വാസ പ്രവര്‍ത്തനങ്ങള്‍ ചെയ്തു  എന്നറിയാന്‍ ആഗ്രഹം ഉണ്ട് എന്ന് പോസ്റ്റ്‌ ഇട്ടു ചോദിച്ച ഒരു മെമ്പറുടെ ചോദ്യത്തിന് വിവിധ പെന്തക്കൊസ്ത് സംഘടനകളുടെ പിണിയാളുകള്‍ ആയ ചില പാസ്റ്റര്‍മാരും,ചില വിശ്വാസികളും ആണെന്ന് പറയുന്നവരില്‍ നിന്നും വലിയ രീതിയിലുള്ള  സൈബര്‍ ആക്രമണം ആണ് അദ്ദേഹത്തിനു നേരിടേണ്ടി വന്നത്. വലിയ വിശുദ്ധി പറയുന്ന പാസ്റ്റര്‍മാരായ ആളുകള്‍ അറക്കുന്ന നിലയില്‍ ആണ് അവിടെ ആ മെമ്പറെ ആക്ഷേപിച്ചു സംസാരിച്ചത്. ഇവരെല്ലാം മുഖ്യധാരാ സംഘടനയുടെ ആളുകള്‍ ആണ്.

തങ്ങളുടെ വരുമാനം നിലച്ചുപോകും എന്നുള്ള ഭയമാണ് ആക്രമണ കാരണം എന്നൂഹിക്കാം.എന്നാല്‍ ഇത്തരം ആളുകളുടെ അനീതി ചോദ്യം ചെയ്തു പലരും രംഗത്ത് വരികയും ചെയ്തു.അത് പോലെ എല്ലാ പള്ളികള്‍ക്കും പെരുന്നാള്‍ ഉള്ളതുപോലെ,അമ്പലങ്ങള്‍ക്കു ഉത്സവം ഉള്ളത് പോലെ പെന്തകൊസ്തുകാരുടെ ഉത്സവം കണ്‍വന്‍ഷന്‍ എന്നറിയപ്പെടുന്നു.അന്നാണ് കോടികളുടെ ബിസിനെസ്സുകള്‍ നടക്കുന്നതും ആളുകളുടെ കയ്യില്‍ നിന്നും വന്‍തോതില്‍ പണപ്പിരിവും തട്ടിപ്പും നടക്കുന്നത്.അത് കൊണ്ട് വിശ്വാസികള്‍ക്ക് പ്രത്യേക പ്രയോജനം ഒന്നും ഇല്ല എന്നുള്ളതാണ് വാസ്തവം.

പൊതുസമൂഹം നിരുപദ്രവികള്‍ എന്ന് കരുതുന്ന പെന്തക്കോസ്ത് സംഘടനയിലെ ചില ആളുകള്‍ക്ക് യാതൊരു സാമൂഹിക പ്രതിബദ്ധതയും ഇല്ലാത്തവര്‍ ആണ്. എന്നാല്‍ ഇതില്‍ ഉള്ള ചുരുക്കം ചില ആളുകളും ചെറുപ്പക്കാരും യുവജനസംഘടനകളും  വളരെ നന്നായി സമൂഹത്തില്‍ ഇടപെടുകയും സഹായിക്കുകയും ചെയ്യുന്നവര്‍ ആണ്.

അതുപോലെ കാഞ്ഞിരപ്പള്ളി രൂപതയുടെ നടത്തിപ്പുകാർ പോർച്ചുഗൽ സന്ദർശന വേളയിൽ കാഞ്ഞിരപ്പള്ളിയിൽ സുനാമി കയറിയടിച്ചു ധാരാള വീടുകൾ നഷ്ടപ്പെട്ടെന്നു അറിയിച്ചതിൽ പ്രകാരം ഒരു ദിവസത്തെ ഞായറാഴ്ചത്തെ സ്തോത്രകാഴ്ച പണമായ 25 ലക്ഷം രൂപയ്ക്കുള്ള യൂറോ നൽകുകയും ചെയ്തിരുന്നു.അത് അവർ പോർച്ചുഗൽ സഭയുടെ വെബ് സൈറ്റിൽ പ്രസിദ്ധീകരിക്കുകയും ചെയ്തിരുന്നു എന്ന് പറയപെടുന്നു .എന്നാൽ കാഞ്ഞിരപ്പള്ളിയിൽ സുനാമി കയറിയടിച്ചതെന്ന് എവിടെയെന്ന് അവിടുത്തുകാർ തിരയുകയാണ്.

.വൈക്കത്ത് നിന്നും വേമ്പനാട്ടു കായൽ ഏറ്റുമാനൂർ വഴി .,പൊൻകുന്നം കൂടി കാഞ്ഞിരപ്പള്ളിയിൽ എത്തി നാശ നഷ്ട്ടങ്ങൾ വരുത്തി സുനാമി തിരിച്ചു പോയതാണോ എന്നും ശുദ്ധാത്മാക്കൾ സംശയിക്കുന്നു.ഇതിനിടെ ഹൈറേഞ്ചു സംരക്ഷണ സമിതിയുടെ ചുമതലക്കാരനായ കൊച്ചുപുരയച്ചന്റെ നേതൃത്വത്തിൽ വിദേശത്തു നിന്ന് വെള്ളപൊക്കത്തിന്റെ പേരിൽ പണം സ്വീകരിക്കാൻ നടത്തുന്ന ശ്രമങ്ങൾക്കെതിരെ വിശ്വാസികൾ ഇടുക്കി രൂപത ബിഷപ്പിനു പരാതി നൽകിയിട്ടുണ്ട്.ഹൈറേഞ്ച് ഡെവലപ്പ്മെന്റ് സൊസൈറ്റി യുടെ പേരിലാണ്.തൽപരകക്ഷികൾ തട്ടിപ്പുമായി രംഗത്തുള്ളത്.


കഴിഞ്ഞ സുനാമി വേളയിൽ സ്വതന്ത്ര മൽസ്യ തൊഴിലാളി യൂണിയന്റെ ചുമതലക്കാരനായ വൈദീകൻ 250 കോടി രൂപാ വിദേശത്തു നിന്നും സ്വീകരിച്ചതും.,കണക്കുകളിൽ കൃത്രിമം ചെയ്യുന്നതും അദ്ദേഹത്തിന്റെ പി എ ആയിരുന്ന കന്യാസ്ത്രീ തന്നെ പത്ര സമ്മേളനത്തിൽ വെളിപ്പെടുത്തിയതും വൻ വിവാദമായിരുന്നു.

ഇപ്പോൾ തന്നെ പല  സഭകളും സഭാ പിതാക്കന്മാരുടെ അക്കൗണ്ടിൽ പണമയക്കാൻ ആവശ്യപ്പെട്ടിട്ടുണ്ട്.ചെങ്ങന്നൂർ കേന്ദ്രമാക്കിയാണ് പല സഭകളും.,പെന്തകൊസ്തു സംഘടനകളും വെള്ളപ്പൊക്ക പിരിവിനായി ഒന്നിച്ചിട്ടുള്ളത്.എന്നാൽ സംസ്ഥാന സർക്കാരിന്റെ കാർക്കശ്യ പൂർണ്ണമായ നിലപാടുകൾ ഇവർക്ക് തടസ്സമായി നിൽക്കുകയാണ്.കൂടാതെ വെള്ളപ്പൊക്ക പിരിവുകളെ  ക്കുറിച്ചു സംസ്ഥാന രഹസ്യ പോലീസും നിരീക്ഷണം കർശനമാക്കിയിട്ടുണ്ട്.

 യേശുദാസിന്റെ തനി ഗുണം തുറന്ന് കാട്ടാൻ ഒരേയൊരു പി.സി ജോർജ് മാത്രം 

  തങ്കച്ചൻ പാലാ

കോട്ടയം: പ്രളയം കേരളത്തെ നക്കി തുടച്ചപ്പോൾ അടിയന്തിരമായി ചേർന്ന നിയമസഭാ സമ്മേളനത്തിലും തലയെടുപ്പോടെ നിന്നു പൂഞ്ഞാറിന്റെ പ്രതിനിധി പി സി. ജോർജ് എം.എൽ.എ . പലരും പറയാൻ മടിക്കുന്ന കാര്യങ്ങൾ ഉള്ളത് ഉള്ള പോലെ പറയാൻ മടി കാണിക്കാത്ത ഒരു ജനപ്രതിനിധിയാണ് പൂഞ്ഞാർ ആശാൻ എന്ന അപരനാമത്തിലറിയപ്പെടുന്ന പി.സി ജോർജ്. 
 തന്റെ മണ്ഡലത്തിലെ പ്രളയക്കെടുതികൾ ക്കിരയായവരെ സംരക്ഷിക്കാൻ മുന്നിൽ നിന്ന അദ്ദേഹം, തന്റെ പാർട്ടിയായ ജനപക്ഷം പ്രവർത്തകർ നടത്തിയ ദുരിതാശ്വാസ പ്രവർത്തനങ്ങൾക്കും മുഖ്യരക്ഷാധികാരിയായി ഉണ്ടായിരുന്നു. ജനപക്ഷത്തിന്റെ പോഷക സംഘടനകളായ ഡ്രൈവേഴ്സ് യൂണിയനും, വാർക്ക തൊഴിലാളി യൂണിയനും, ഷോൺ ജോർജിന്റെയും, ആന്റണി മാർട്ടിൻ, ജോയ്സ് വേണാടൻ, റെനീഷ് ചൂണ്ടച്ചേരി, സദ്ദാം കനിക്കുട്ടി, സബീർ തടവനാൽ എന്നിവരുടെ നേതൃത്വത്തിൽ യുവജന പക്ഷവും നടത്തിയ ദുരിതാശ്വാസ പ്രവർത്തനങ്ങൾ എതിരാളികളു,ടെ പോലും പ്രശംസ പിടിച്ചുപറ്റി. 
അതിലുപരിയായി നിയമസഭയിൽ പി.സി ജോർജ് ഉന്നയിച്ച ചില കാര്യങ്ങളാണ്ഏറെ പ്രസക്തമായിട്ടുള്ളത്. സാർ നമ്മുടെ സാഹിത്യനായകന്മാരും ഒക്കെ ഈ വെള്ളപൊക്കത്തെ കുറിച്ച് ഒന്നും പറയുന്നില്ലല്ലോ ,യേശുദാസ് നമ്മുടെ ആസ്ഥാന ഗായഗനല്ലെ എന്താണ്  സാർ ഇവർ പ്രതികരിക്കാത്തത്. ഉടനെ മുഖ്യമന്ത്രി പറഞ്ഞു യേശുദാസ് ഈ ദുരന്തത്തിന് എല്ലാ സഹായവും വാഗ്ദാനം ചെയ്ത് കൊണ്ട് എന്നെ ഫോണിൽ വിളിച്ചു .അദ്ദേഹം ഇവിടെയില്ല അമേരിക്കയിലാണ് .
 മുഖ്യമന്ത്രി ഇങ്ങനെ പറഞ്ഞ് യേശുദാസിനെ രക്ഷിച്ചെങ്കിലും, ആരും പറയാൻ മടിച്ച ഇക്കാര്യം നിയമസഭയിൽ പറഞ്ഞ് ശ്രദ്ധ നേടുകയും, രാഷ്ട്രീയ കേരളത്തിൽ ഒരു ചർച്ചയാക്കി മാറ്റുവാനും ഇത് മൂലം പി.സി ജോർജിന് കഴിഞ്ഞു.തങ്ങൾക്കു പറയാൻ കഴിയാത്ത ഈ പ്രശ്നം നിയമസഭയിൽ ഉന്നയിച്ചതിനെ മറ്റു പാർട്ടിയിലെ മിക്ക സാമാജികരും പി സി ജോർജിനെ അഭിനന്ദിക്കുകയും ചെയ്തു.
. സി.പി.എം ,ബി.ജെ.പി ,കോൺഗ്രസ് തുടങ്ങിയ പാർട്ടികളിലെ എം.എൽ.എ മാർ പറയാൻ മടിച്ച കാര്യമാണ് യേശുദാസിന്റെ വെള്ളപൊക്ക കാലത്തെ കടുത്ത നിസ്സംഗത. സംസ്ഥാന അവാർഡ് പല കുറി നേടുകയും, സംസ്ഥാനം ആസ്ഥാന ഗായക പട്ടം കൊടുത്ത് സ്വീകരിക്കുകയും ചെയ്യപ്പെട്ട മാന്യ ദേഹമാണ് കെ.ജെ യേശുദാസ്. ജനങ്ങൾ വളർത്തി വലുതാക്കിയ ഈ ഗായകന്റെ നിസ്സംഗത വലിയൊരു ജനതയോടുള്ള നിസ്സംഗതയായേ കാണാൻ പറ്റൂ. 
അക്കാര്യം തുറന്നു പറയാൻ ഒരു പി സി ജോർജ് വേണ്ടി വന്നൂ എന്ന് മാത്രം.ഇങ്ങനെയുള്ള കാര്യങ്ങൾ .,മറ്റുള്ളവർക്ക് ബുദ്ധിമുട്ടുള്ള കാര്യങ്ങൾ പറയുകയും ചെയ്യുകയും ചെയ്യുന്നത് കൊണ്ടാ ഞങ്ങൾ ഇരുപത്തി ഏഴായിരത്തിന്റെ ഭൂരിപക്ഷം കൊടുത്തു തെരെന്തരത്തേക്കു അങ്ങേരെ വിട്ടത് ഈരാറ്റുപേട്ടയിലെ ബാപ്പുട്ടിക്കാ ഇക്കാര്യം ഈ ലേഖകനോട് പറയുമ്പോൾ കൂടെയുള്ള ഓട്ടോ ഡ്രൈവർമാരും അത് ശരിവയ്ക്കുന്നു.
 അതുപോലെ തന്നെ സിനിമാ സംഘടനയായ അമ്മ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകിയ തുകയേക്കുറിച്ചും അഭിപ്രായ വ്യത്യാസം ഉയർന്നിട്ടുണ്ട്. കേവലം പത്ത് ലക്ഷം രൂപാ മാത്രമാണ് അവർ നൽകിയത്. അഞ്ഞൂറോളം അംഗങ്ങളുള്ള സംഘട യാണ് ഇത്തരത്തിലുള്ള ഉട്ടോപ്യൻ, തീരുമാനമെടുത്ത് സ്വയം അപഹാസ്യമായത്. സിനിമാ രംഗത്ത് താരതമ്യേന മുന്നോക്കമല്ലാത്ത സുരാജ് വെഞ്ഞാറമൂട് പത്ത് ലക്ഷം രൂപാ കൊടുത്തപ്പോഴാണ് പല കൊടി മൂത്ത താര പ്രമാണിമാരും ഇരുപത്തഞ്ച് ലക്ഷം രൂപാ കൊടുത്തത് തന്നെ .
ഇവരുടെ സിനിമകൾ ബഹിഷ്ക്കരിക്കണമെന്ന സോഷ്യൽ മീഡിയായിൽ പ്രചരിക്കുന്ന വോയ്സ് കളിപ്പിന് വൻ സ്വീകാര്യതയാണ് ലഭിച്ചു കൊണ്ടിരിക്കുന്നത്. ഇതിലെല്ലാം രസകരമായിട്ടുള്ളത് കേരളത്തിലെ ചുമട്ടുതൊഴിലാളികൾ മുഖ്യമന്ത്രിയുടെ ദുരിതാശ്വാസ നിധിയിലേക്കു് മൂന്ന് കോടി രൂപാ സംഭാവന നൽകി എന്നുള്ളതാണ്.


Author Name

Admin

കോൺടാക്റ്റ് ഫോം

നാമം

ഇമെയില്‍ *

സന്ദേശം *

Blogger പിന്തുണയോടെ.